الي تكسبه إلعبه .. واقع

معاكم اخوكم زيون47

كنت طالب ادرس طب بشري بإيرلندا و بالتحديد بدبلن العاصمة ..

طبعا جامعتي اهي الوجهة الاولى للطلبة الكويتيين و الخليجيين عموما .. جامعة لها احترامها و سمعتها و تاريخها و كثير من اطبتنا الكويتيين تخرجوا منها ( منهم الدكتور الجارالله الوزير السابق ) .. و متخصصة بالطب البشري فقط و قبل سنوات بسيطة أدخلت تخصصي العلاج الطبيعي و الصيدلة للكلية ..

المهم ..

مثل أي شاب كويتي ما كان قد المسؤولية و قسوة الغربة .. ضيعت وقتي هناك .. و قعدت ثلاث سنين و نص هيمان بالحياة الاوروبية .. و لو ان ايرلندا مو مثال قوي لاوروبا بس تمشي الحال .. عاد الشغلات الي عجبتني و ابهرتني بعد فترة حسيتها اشياء بسيطة ! بس بأول نظرة لي بهرتني .. مثل شنو ؟ هممم .. عندكم اول شي سياقتهم بالشوارع .. كل حارة تعتبر كأنها سكة حديدية لقطار .. مستحيييل اي شخص بالحارة الجانبية انه يلف عليك او يبتون و ينام عليك .. شي ثاني .. المستوصفات دائما هادئة استغربت بالبداية بعدها عرفت السر .. نظامهم كله بحجز موعد مع الدكتور .. يعني اذا كانت حالتك مسكته الله وياك و روح المستشفى .. اما اذا حالتك عادية و تبي استشارة طبيب سجل موعد و انطر .. فعشان جذي ما تلاقي بالمستوصفات الا اصحاب المواعيد .. الجامعات لها معدلات محددة للقبول لا واسطات تمشي حق عيالهم او شي ثاني .. الناس مهما وصلوا معدل سكرهم او حتى تخلفهم التعليمي كانوا لبقين بالتعامل معانا ..

على طاري الجامعات .. الواسطة الوحيدة الي شفتها شفتها من ربعنا بالتعليم العالي :)

كان في جامعة فيها مقاعد محددة للكويتيين و يدخلونها دايركت .. اما بقية الكويتيين يدرسون الثانوية الايرلندية و بعدما يحصلون معدل تقبلهم هالجامعة او جامعتي ..

شسووا ربعنا .. تخيلوا معاي نشوف الي نسبته 3.40 بالمقررات بهالجامعة مقبول دايركت و الي نسبته 3.80 متنقع بالثانوية الايرلندية .. فهذه الواسطة الوحيدة الي شفتها و كانت من ربعنا مو من الايرلنديين

طبعا ملاحظين من كلامي كلمات .. كان و كنت و كانت .. فاعتقد دريتوا اني حاليا مو هناك :)

بالفعل .. اهملت اهمال كبير بالدراسة و سقطت سنتين بالجامعة و طردوني .. و الطرد استحقه 100 بالامية

حزة سقوطي الاخير و طردي من الجامعة .. كان في عدة خليجيين نفس حالتي .. واحد منهم الله يذكره بالخير بحريني

البحريني يمكن سقط اكثر مني .. بس اهو الوحيد الي استمر

تهقون شسوه البحريني ؟

هذا الله يسلمكم كان مع شباب اعرفهم رايحين السينما .. تحرشوا فيهم شوية سكارى اهو قام و يبي يطقهم .. المهم عطوه وحدة خفيفة على راسه و بلع العافية .. و شافوا شرطي و قالوله عن السكارى

هالحجي قبل الامتحانات بتقريبا شهرين ..

المهم عقب السقوط و طرده من الجامعة كلم سفارته .. سفارته ما قصرت دزوله مبعوث خاص عشان يكلم الجامعة .. و للعلم الكويتيين بالجامعة يمكن ثلاثين بكل دفعة .. و البحرينيين يمكن تسعة بكل الدفعات

هالمبعوث مو هين الصراحة .. شاف ماكو فايدة مع الجامعة و قعد يسولف مع صاحبنا اذا حاشته اي مشكلة نفسية .. طبعا مادري شلون يابوا محضر من الشرطة عن سالفة الهوشة مع السكارى و رفعوا قضية عالجامعة و الجامعة ردت ان لازم انييب طبيب نفسي للطالب يحكم على حالته النفسية هل تستحق التظلم .. الزبدة قعد الريال بالجامعة و احنا طلعنا ..

بصراحة استانست عليه .. قدر بذكاء و حيلة انه ياخذ الي يبيه من الجامعة بالقانون ..

القانون الي قبل شهر تقريبا قرينا كلام عن تعليقه في بلدنا الحبيب ..

و بداية الاسباب حق هالمشاكل بالديرة و تعليقه اهو الصراع الغير منتهي بين الاصلاح و الغير اصلاح

ماني قايل حرامية او ... ماني قايل مظلموين .. بكون كثر ما اقدر محايد ولو ان القلب يميل لربع الاصلاح

من بعد الغزو و الى الحين و الاسطوانة ما خلصت .. و ما توصلنا الى حل .. فلا الي متهم بقضية الناقلات و غيرها خذا نصيبه من العقاب و لا الاصلاحيين حصلوا مرادهم من هالتعب ..

انزين لي متى يعني ؟

البلد في تأخر مستمر .. و الواقع يقول اننا متأخرون وايد وايد وايد

ليش ربعنا ما يسوون مثل صاحبنا البحريني و ياخذون الي يبونه ؟

الاصلاح مو بس بادخال الحرامي السجن ... الاصلاح بأنك تشوف الواقع الي امامك و تستغله في اصلاح ما يمكن اصلاحه من البلد .. يعني انا غاسل ايدي من عقاب المتهم بالناقلات .. و ادري ان الفلوس خلاص طارت و توزعت .. الواقع يقول خلاص اتخذ هالقضية عبرة و ضرب للمثل للحاضر و المستقبل .. احارب الي قاعد يسرق الحين مو مشكلة .. بس بنفس الوقت خل ازرع عند النشء تحريم مثل هالجريمة منذ الصغر .. ربعنا الاسلاميين الي يسهرون الليل و ينظمون الاجتماعات عشان ادخال المزيد من احكام الشريعة في منهج الاسلامية في المدارس .. مادة الحفظ قبل يوم الامتحان .. خل يدزون بين هالشريعة جريمة سرقة المال العام .. و قدسية هذا المال الي لازم نكون حريصين اشد الحرص عند التعامل معاه ..

الاصلاح مو اني اعرف رقم ميزانيتنا و انتظر اراقب يد اول سارق يبوقها انا اصرخ و العلع صوتي !

قبل ما يرصدون رقم الميزانية اعد المشاريع و اطرحها و خلها اول تفكيرك قبل ما تحرك مصادرك عشان تعرف منو الي باق و منو الي تسلف و الخ ..

عصر الصراخ و كشف الاسماء و ذكر ان هذا حرامي و هذا عنصر فساد والله انتهى .. نبي انتاجية يا جماعة .. نبي شي محسوس و ملموس .. موضة السعدون و مسلم و ربعهم المحاربين والله ما راح توصلنا الى بر خلاااص .. هالكلام حق الشعبيين او الديمقراطيين من القراء .. انا بصراحة مليت .. ابي اشوف المشاريع

و السلام عليكم و تقبلوني مدون يديد ..

اي صج ما كملتلكم القصة ..

عقب ما شاتوني الجامعة .. قعدت اشهر بالكويت اقرر وجهتي القادمة ..

و كانت لايعة جبدي من الطب .. ابي اغير ابي شي يديد عشان احس اني بلشت بداية يديدة .. بس الشي الي مخليني اتراجع اهو رغبة الوالد الملحة بالطب و تسمية الناس لي بدكتور و انا لي الحين بسنة اولى فـ فشلة عقب كل هذا ما اصير دكتور..

فقلت ماكو الا طب اسنان .. و دشيت التخصص بإحدى جامعات الامارات .. فأكيد عرفتوا ليش وايد اييب طاري المشاريع بالكويت .. لاني قاعد اشوف بلاوي هني !

و سامحونا عالطوالة ..